အန်တိုနီ ဆန်းတို့စ် ကတော့ ပရီးမီးယားလိဂ် ကလပ် မန်ချက်စတာယူနိုက်တက် ကနေ ရီးရဲလ်ဘက်တစ်ကို အငှားနဲ့ ပြောင်းရွှေ့ခဲ့တာက သူ့ဘဝရဲ့ အကောင်းဆုံး ဆုံးဖြတ်ချက် ဖြစ်ကြောင်း ပြောကြားခဲ့ပါတယ်။ ဒါပေမယ့်လည်း အဆိုပါ ဘရာဇီးလ် တောင်ပံ ကစားသမားက ဒီရာသီအကုန်မှာ ရီးရဲလ်ဘက်တစ်မှာ ဆက်ရှိနေဖို့တော့ မသေချာသေးကြောင်း သူကိုယ်တိုင်လည်း အနာဂတ်ကို သေချာမသိသေးကြောင်း ဖွင့်ဟလာခဲ့ပါတယ်။
အန်တိုနီဟာ ၂ဝ၂၂ မှာ အေဂျက်စ် ကနေ မန်ချက်စတာယူနိုက်တက်ဆီ မြင့်မားတဲ့ ပြောင်းရွှေ့ကြေးနဲ့ ပြောင်းလာခဲ့သူ ဖြစ်ပါတယ်။ ဒါပေမယ့်လည်း မျှော်လင့်ထားသလောက် မစွမ်းဆောင်နိုင်ခဲ့သလို လက်ရှိ ရာသီ မှာလည်း ပရီးမီးယားလိဂ် ပွဲစဉ် ၈ ပွဲသာ ကစားခွင့်ရခဲ့ပါတယ်။ ဒါကြောင့် အန်တိုနီက ယူနိုက်တက် ကနေ အငှား ထွက်ကစားခဲ့ရပြီး ဘက်တစ် မှာတော့ သူ့ရဲ့ ပုံမှန် ခြေစွမ်းကို ပြန်လည် ရရှိထားပြီ ဖြစ်ကြောင်း လက်ခံထားသူ ဖြစ်ပါတယ်။
DAZN နဲ့ အင်တာဗျူးမှာ အန်တိုနီက “ကျွန်တော် ဒီမှာ အရမ်းပဲ ပျော်ရွှင်နေပါတယ်။ ဒါပေမယ့် ဆုံးဖြတ်ချက် ချဖို့က နည်းနည်း စောနေပါသေးတယ်။ ကျွန်တော့်ကို ကျွန်တော် ပြန်ရှာတွေ့ထားခဲ့ပါပြီ။ ပျော်ရွှင်မှု လိုအပ်ပါတယ်၊။ မိသားစုလည်း ပျော်ရွှင်ဖို့ လိုပါသေးတယ်။ နေ့ရက်တိုင်း မှာတော့ အခု ဆုံးဖြတ်ချက်က အကောင်းဆုံးပဲလို့ ခံစားရပါတယ်။ မြိုတော် ကလပ်မှာ ဖြတ်သန်းရတဲ့ နေ့စဉ်ဘဝကို ကျွန်တော် သဘောကျပါတယ်။” လို့ ဆိုပါတယ်။
အသက် ၂၅ နှစ် အရွယ် အေဂျက်စ် တောင်ပံ ကစားသမားဟောင်းဟာ ဇန်နဝါရီ အပြောင်းအရွှေ့ ဈေးကွက်မှာ စပိန်ကို ရောက်ရှိလာ ပြီးကတည်းက ဘက်တစ် အတွက် တောက်လျောက် ခြေစွမ်းပြနေပြီး ပြိုင်ပွဲစုံ ၁၂ ပွဲ ကစားရာမှာ ၄ ဂိုးသွင်းကာ ၄ ဂိုး ဖန်တီးပေးထားပါတယ်။ အန်တိုနီဟာ ဂိုးမသွင်းနိုင်တဲ့ ပွဲစဉ်တွေ မှာလည်း ဘက်တစ်ရဲ့ နိုင်ပွဲတွေ အတွက် အရေးပါသူ တစ်ဦး အဖြစ် ရှိနေခဲ့တာကို မြင်တွေ့ရပြီး ဖြစ်ပါတယ်။ ဒီလိုမျိုး ကောင်းမွန်တဲ့ စွမ်းဆောင်ရည်တွေကြောင့် ဘက်တစ် အသင်းဖော် အစ္စကိုက အန်တိုနီကို နောက်ရာသီ ဆက်လက် ခေါ်ယူထားဖို့ ပရိသတ်တွေ ဆီက ရန်ပုံငွေ စုဆောင်းဖို့ တောင်းဆိုထားခဲ့ပါသေးတယ်။ ဒါ့အပြင် ရီးရဲလ်ဘက်တစ် နည်းပြ မန်ဝဲလ် ပယ်လီဂရီနီ ကလည်း ဆီဗီလာနဲ့ ဒါဘီ ပွဲစဉ်မှာ အနိုင်ရရှိပြီးနောက် အန်တိုနီကို ချီးကျူးစကား ပြောကြားခဲ့ပါတယ်။
နောက်ဆုံး မှာတော့ အန်တိုနီက “ဆီဗီးလ်က ဘရာဇီးလိုပဲ နေပူတာနဲ့ အစားအသောက်တွေက အစ ရင်းနှီးနေပါတယ်။ ဒီက လူတွေ ကလည်း နွေးထွေးကြပါတယ်။ ဒါက ဘရာဇီးလ် လူမျိုးတွေ အတွက် အရေးကြီးတယ်။” လို့ ပြောကြားသွားခဲ့ပါတယ်။ ရီးရဲလ်ဘက်တစ်ဟာ အန်တိုနီ ရောက်ရှိလာချိန်ကစလို့ ရှုံးပွဲ တစ်ပွဲသာ ရှိထားပြီး လာလီဂါ မှာတော့ ဥရောပ ဝင်ခွင့် အတွက် တိုက်ပွဲ ဝင်နေဆဲ ဖြစ်ပါတယ်။ ဒါ့အပြင် ဘက်တစ်က ယူရိုပါကွန့်ဖရင့်လိဂ် မှာလည်း ကွာတားဖိုင်နယ်ကို ရောက်ရှိနေပါတယ်။
လာမယ့် စနေနေ့ မှာတော့ ရီးရဲလ်ဘက်တစ်က လာလီဂါ ဇယားထိပ်က ဘာစီလိုနာနဲ့ ကစားရမှာ ဖြစ်ပါတယ်။ ဒါကြောင့် အန်တိုနီ အနေနဲ့ အဲဒီပွဲမှာ ဘက်တစ် အတွက် ဘယ်လောက် အထိ ခြေစွမ်းပြနိုင်ဦးမလဲ ဆိုတာ စောင့်ကြည့်ရဖို့ ရှိနေပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , တွစ်တာ , အင်စတာဂရမ် and ယူကျု့ဘ်.
